هذه الصفحة تعتمد على صفحات الطرز المتراصة (CSS)
| &lArr
2007/03/16

إيدك…دا المسيري يا بجم!

اخص حقيقي! دفشوا المسيري!

الرجل أصلا صحته على قده و لما مسك الميكروفون علشان يقول بيان ما حدش أخد باله.

و بعدين أنا نازل يوم 15 مارس 2007 في مظاهرة للتنديد بتعديلات دستورية هتلغي الإشراف القضائي على الانتخابات، و هتحول كل مواطن إلى مجرم و إرهابي إلى أن يثبت العكس، و هتقنن انتهاك الدور و التنصت على كل وسائل الاتصال، و تفتيش الناس و الممتلكات في أي وقت حسب مزاج العسكري…قوم إيه…آلاقي الناس بتهتف هتافات يونيو 2005!!

ما حدش في الشارع عرف أساسا المية بني آدم دول بيزيطوا على إيه..و تسجيلات الفضائيات مش هتظهر أي لمحة من هدف المظاهرة.

هتاف ضد حسني و دم شهداء 67 و أبو الغيط عميل إسرائيل!

و بعد كل دا يقوم كام نفر مطلّعين علم عرّة بنجمة زرقا و خطين ويحرقوه…أسخف لحظة مرت عليّ في أي مظاهرة…كنت مدّي ضهري للطقس الوثني دا و باصص في الأرض الحقيقة من الكسوف.

و بعدها يطلّعوا خرقة من ال بتتباع في دكاكين وسط البلد للعيال السيس علشان يربطوها على دماغهم عليها خطوط حمرا و زرقا و نجوم بيضا، و يولعوا فيها برضو و يصرخوا كأنهم بيستعدوا لغزوة!

كان هاين عليّ أبوس راس عرّيف فرقة العسكر و أقول له حقك عليّ أنا غلطت أني جيت النهاردا خليني أروّح لماما.

قبل ما أدخل، لمحت من بعيد مالك مسيطر كالعادة لوحده على مساحة 15 متر مربع من أرض الحصار، ما حدّش قادر يحطّ فيها رجل، لا من العسس و لا من المتظاهرين المحاصرين.

أنا أصلا بعد ما شفت ميدان التحرير و الاعتقالات و فهمت أن ما فيش أمل لأي تجمع مفيد ما كنتش ناوي أدخل أتزنق المزنق دا في الشارع السد ال فيه مقر حزب التجمع لولا أني اتعصبت لما شفت المسيري بيتزق.

آه صحيح، حزب التجمع…البهوات كان عندهم مؤتمر حزبي و كانوا متضايقين من أن صوت المتظاهرين بيشتت انتباه الكوادر الحزبية و بيخليهم يسيبوا المؤتمر و يقفوا يهتفوا معنا من البلكونة…هايل الحقيقة. و حزب الغد عملوا الشو بتاعهم من البلكونة برضو…كفاية المفروض تشد حيلها و تأجر شقة مفروشة بڤيو على ميدان بتمثال في وسط البلد برضو. و الوفد سمعت أنهم نشروا خبر اعتراض القوى الوطنية على التعديلات الدستورية في جرنالهم الصبح بالبنط مقاس 300 بتاع العميان و ما شفتش منهم بني آدم أخضر بطربوش يوحد ربنا.

لكن برافو…

الأمن أجهض المظاهرة بكل نجاح

الحشود الأمنية كانت أكثف حاجة شفتها في حياتي، غالبا أكثر من مظاهرات الجامعة، و ممتدة في كل شوارع وسط البلد، و استمرت ساعات طويلة بعد فض المظاهرة، و تشكيلات العسكر فضلت على النواصي لبالليل.

عبور الشارع كان من على خطوط عبور المشاة، و من نفق المترو و المشي على الرصيف بس داخل أسوار المعيز ال معمولةلنا…المرور كان منضبط جدا النهاردة

واحد صفر للداخلية…أحسن شباب

معلش هنتعبكم معانا و هنعمل كدا كل ثلاث أيام…و هي حاجة نعملها في الصيف بدل الحرّ

20:48 22-03-2007

تعليق سلمى سعيد عن موقف التجمع من المظاهرة.

(17) تعليقات

  1. لا يا أحمد يا أخويه دا طلع مؤتمر للناصري عشان أرض محايدة مش للتجمع
    وفي اخر الليل نزل كام واحد بيشتم سامح عاشور وميتين اللي جابوا عاشور وبيقول ان عاشور كوس الإنتخابات وإتضح على 11 ونص ان الإنتخابات أصلا متعملتش وحتتعمل يوم تاني :P
    بعدين ياعم طول مافيها أيدلوجيات ناصرية وقومجيه وإسلامية ويساريه وبطيخيه إنتا عايز مظاهرة تعمر ولا تقول كلمه لها علاقه بالواقع كله في الديمجوجي وانا أحبك يا ناصر

      مالك @ 04:06 2007/03/16

  2. Salam alikom,
    3ash el batal Ahmad gharbeia wa yasqot el Re3a3 we sa3d el soghannan

    Salamy le Sherif 3asaleya

      Tamer Shokran @ 04:40 2007/03/16

  3. Ya Ahmed enta betendah fe Malta ……………………..Do you remember our High School …it is the same people mafeesh fayda

      Tamer Shokran @ 04:41 2007/03/16

  4. علي فكرة يا احمد الامن ملوش دعوة ده جون دخلناه في نفسنا ولا مشفتش المسيري وهو بيتخانق مع البنت السمرة الي معاه في الحزب ولا مشفتش واحد من المدونين من غير زكر اسماء وهو بيزعقله وبيعلي صوته عليه مع انه من ولاده السياسيين ومع انه خيره عليه ولو محترمش مكانة الراجل يحترم سنه ثم مين الي وزع الناس علي الميادين وثم احنا متوقعين الامن كده وخبر الاعتقالات كان موجود من قبلها بتلات ايام يا عم كبر دماغك مش طالبة خنقة

      كبير المتشردين @ 15:29 2007/03/16

  5. ياكبير المتشردين اللي وزع الناس ع الميادين الأمن دا اولا
    اللي جبنا التجمع هو عمنا عبد القدوس في حركة مش مفهومه ابدا منه ﻷنه بدأ في المكان دا من الساعه تلاته ونص العصر قبل المظاهرة بساعة ونص يمكن أكتر….ممكن أتفهم انه عايز الناس تعمل مسيرة من هناك لحد التحرير بس مش قادر افهم ليه بدأ لوحده من بدري كدا …
    انا مش عارف بنت سمره مين ومع مين في الحزب ؟ المسيري في كفاية والوسط ومشفتش بنات سمر من الوسط ولا كفاية بيتاخنقوا معاه …
    بالنسبة للمدون اللي انت مش عايز تذكر اسمه هو معلاش صوته ع المسيري هو علاه على كمال أبو عيطة عشان كان في رأي بيقول اننا نمشي بدري والمدون رفض دا وعلى صوته….
    امبارح كان يوم طحن غبي فمكنتش غلطة كفاية ابدا امبارح بالعكس امبارح كان في اعداد كويسه منتدوره هنا وهناك والأمن كان عدده غبي دي اول مره أشوف القوات دي من بعد يوم 26 إبريل .

      مالك @ 01:17 2007/03/17

  6. دا الفرق بين مظاهرة التنظيم ومظاهرة الحركة..
    مظاهرات التنظيم بتبقى ماشية بالمسطرة.. هتاف موحد (حتى لو مش سامعين الميكروفون بردو بيهتفوا وراه بالضبط) ورسالة محددة بتاعة الايديولوجية اياها.. مظاهرة الحركة المفروض انها تجمع متعاطفين من الشارع بالاضافة لسلطة الفواكة اللي جواها..

    من أفضل مظاهرات كفايةعلى الاطلاق من ناحية التنظيم، مظاهرة 27 سبتمبر.. وقتها الاشتراكيين كانوا عاملين شغل جوة شباب من أجل التغيير، وشباب شكلت لجنة النظام للمظاهرة اللي قلبت بمسيرة.. لجنة النظام فتحت المرور ووجهت خط السير وكانوا لابسين شريطة على دراعهم ومعاهم صفافير وكدة.. المسيرة، لكبر حجمها، كانت مقسمة لثلاث مجموعات.. واحدة بيهتف فيها كمال خليل، وواحدة لكمال أبو عيطة، وواحدة لشباب التيارات المختلفة

    آيييه
    كانت أيااام

    المهم، انت سليم؟

      نورا يونس @ 16:00 2007/03/17

  7. ألف كان في حماية الأمن
    و يقال انه عميل سري و خاص و رتبته كبيرة
    و آدي الدليل

      عمرو عزت @ 03:04 2007/03/18

  8. خل بالك من نفسك بقى يا عمرو عزت :)

    أنا سليم يا نورا، أشكرك.
    و طبعا فاكر 27 سبتمبر. الصفارات كانت إضافة الشباب بعد ما عمرو قدم الطبلة للمظاهرات.

    لكن أنا مش فاهم وجهة نظرك في الفرق ما بين الحركة و التنظيم! الحركة تنظيم برضو. معك في أن في فرق بين كفاية كحركة و بين الأحزاب، لكن كفاية تنظيم، و إن كان غير مركزي و فضفاض في أيديولوجيات أفراده. لكن ال حصل دا فشل تنظيمي. ما هو مش معقول ال نازل اليوم دا مش عارف أنه مش نازل يعترض على تعديلات الدستور، و في إطار كفاية!

    شكرا يا مالك على التصحيح بخصوص الاجتماع، لكن دا ما يغيرش حاجة من سخافتهم.

    و يا كبير المتشردين أنا مشيت على الساعة 19:30 و ما شهدتش ال بتقول عليه لكن أشك أن أي حد ممكن يزعق في المسيري و هو عارف هو مين، و مصدق رواية مالك، و أنا مقتنع أن تفرُّق الناس سببه الأمن لأن دا أنا لمسته بنفسي. و سمعت زيك عن المحاضر الجاهزة من يوم 10 مارس.

      ألِف @ 17:48 2007/03/18

  9. جامدة بتاعت العيال السيس دى ممكن فى التاريخ نذكرها انها كانت اشبه بمظاهره للعيال السيس

    لا بجد موضوع الهتاف و ان الناس جاية تهتف و خلااص موضوع يففقع الصراحة

    عاملين زى الىل دخل فرح غلط و قرر انه يقعد و يهلل للعريس و العروسة الغلط

    لمجرد ان فى اكل فى الفرح

    و العاقبة عندكم فى المظاهرات

      GEMYHOoOD @ 01:55 2007/03/19

  10. خيرها ف غيرها
    .. بس الا ما حد قال اي ميزه حصلت ف المظاهره دي

    وصحيح حيفضل الناس كدا طول ما فيه تجمع ووفد واخوان وبطيخ وكفايه

    بس انا عاجبني اوي اسم حزب البطيخ

      خجل @ 15:49 2007/03/19

  11. ساعات باحلم بمظاهرات زمان و ثورات زمان
    و صور و اشكال زمان الموجوده حتى فى حواديت الناس عنها

    ياترى كل حاجه ساعتها كانن ليها معنى غير الفركشه اللى احنا فيها
    ولا احنا اللى بنتخيل

      Dananeer @ 22:09 2007/03/20

  12. الواضح ان الفترة المقبله والتي تسبق الاستفتاء ستشهد
    تصعيد امني عالي جدا
    والمكالمه التي سبقت المظاهرة للدكتور المسيري تؤكد هذا
    وبعدين موضوع مقاطعه الاستفتاء بصراحه يحتاج لمناقشه

      citizenragb @ 12:18 2007/03/22

  13. دا رأيي أنا كمان؛ أن موضوع المقاطعة محتاج نقاش.

    المقاطعة أثرها لا يظهر لأن الحكومة يمكن أن تتعمد إغفال توضيح نسبة المصوتين إلى من لهم حق التصويت، عند إعلان النتيجة؛ و المقاطعة تسهل “التصويت بالنيابة عن المواطنين”؛ أي تسهل تزييف الأصوات.

    تعرفوا أن الحزب الوطني يحتفظ بالبطاقات الانتخابية لأعداد ضخمة من أعضاؤه؟

    أنا أحبذ إما:

    التصويت بالرفض، و عيبه أنه تجاوب مع ممارسة مرفوضة من الحكومة، و لا يقلل من إمكانية تزوير النتيجة؛

    أو إبطال الأصوات و هو فعل احتجاجي إيجابي، و لا يقلل أيضا من إمكانية تزوير النتيجة.

    التزوير حاضر دائما و لا نثق في إدارة الحكومة للاستفتاء، إضافة إلى شراء الأصوات. نعمل إيه؟

      ألِف @ 20:25 2007/03/22

  14. لا يهم إن كنت مع أو ضد التعديلات الدستورية التي سوف يتم التصويت عليها بعد أيام. ولكن المهم أن أن نبدأ في أن نعي أن تلك التعديلات سوف تغير وجه مصر إلى الأبد. لست وطنيًا ولكني مازلت أحب بلدي ولا أستطيع نزعها من وجداني. إن كنت مغتربًا من ضمن الستة ملايين مغترب مصري، ويهمهك أن يسمع صوتك، ويغيظك أن يتم تجاهلك، شارك برفع قضية ببطلان الاستفتاء لاستثناء المغتربين المصريين من التصويت.

    اذهب إلى أقرب قنصلية مصرية واستخرج توكيل عام قضايا باسمك للأستاذ عصام عبد العزيز الإسلامبولي المحامي أمام القضاء الإداري والمحكمة الدستورية العليا. ثم أرسله إلى عنوانه في عمارة استراند 133 شارع التحرير – القاهرة

      autoscriptor @ 16:47 2007/03/23

  15. اعتقد ان التصويت بالرفض هيكون
    افضل الحلول
    إبطال التصويت ممكن يكون مفيد لو في اطار حركه منظمه تدعو اليه
    وبصراحه فرصه نعرف قوة المعارضه في الشارع
    وكم من الاصوات تستطيع المعارضه تجميعها
    فالحكومه سوف تعلن عن الاصوات الباطله
    ولكن الاصوات الرافضه ….اشك
    المهم يبقي في تنظم للمعارضه وكله يتفق علي فعل واحد
    بس بلاش المقاطعه دي لا نها فعلا سلبيه
    ومبتجبش نتيجه (جربناها كتير قبل كده……..

    علي ذكر المقاطعه
    الشيخ طنطاوي اعلن ان من يقاطع الانتخابات شيطانا اخرس !!

      citizenragb @ 14:25 2007/03/24

  16. فعلا يا مواطن رجب، أنا معك في أن إبطال الأصوات يكون أفضل لو عدد كبير ملتزم به. دا رأيي ال قلته في مكان آخر.

      ألِف @ 18:01 2007/03/24

  17. أنا رأي…مع إني بره مصر من ضمن الستة مليون مصري صدروهم للخارج لأن التصدير هدف إستراتيجي…..المهم…المقاطعة أو الرفض أو البطلان كلها عمليات محتاجة وقت للتنظيم و التوعية و الحشد
    اللي ممكن يتعمل أكتر هو الوقفة الإحتجاجية ..ولو بالشارات …قدام لجان الإنتخاب و توزيعها على المنتخبين
    الأهم إللي جاي بعد كده ..بغد ما يتقندل الدستور……مشوار طويل وصعب و مش عايز يأس بس عايز تنظيم و تحديد خطوات
    الأهداف متحددة…حكومة إنتقالية و جمعية تأسيسية…بس دي في المستقبل القريب
    علشان ما يحصل إحباط…فيه بتاع 30 أو 40 هدف ضغننين ورا بعض يتموا و نخش على الهدف الكبير
    و مع السلام عليكم بقى

      شادي سليم @ 02:08 2007/03/26

عذرا، التعليقات مقفلة.